انا قلب كورة والفراودة اكم
ياما اتبطح واتشاط وياما اتعكم
وقوله كله هينتهى فى المعاد
يقولى ساعتك والا ساعة الحكم
عجبى
****
الضحك قال ياسم على التكشير
امشير وطوبة وانا ربيعى بشير
مطرح ما يظهر ينتصر على العدا
انشا الله اكون رسمته بالطباشير
عجبى
****
سمعت نقطة ميه جوا المحيط
بتقول لنقطة متنزليش فى الغويط
اخاف عليكى من الغرق
قلت انا دا اللهى يخاف من الوعد يبقى عبيط
عجبى
****
لو فى سلام فى الارض وضمان وآمن
لو كان مفيش ولا فقر ولا خوف وجبن
لو يملك الانسان مصير كل شئ
دا انا كنت اجيب للدنيا ميت الف ابن
عجبى
****
علم اللوع اضخم كتاب فى الارض
بس اللى يغلط فيه يجيبه الارض
اما الصراحة دا امرها ساهل
لكن لاتجلب مال ولا تصون عرض
عجبى
****
اوقات افوق ويحل عنى غبايا
واشعر كأنى فهمت كل الخبايا
وافتح شفايفى عشان هقول الدرر
مقلش غير حبة غزل فى الصبايا
عجبى
****